बाह्रविसेमा नगरपालिकाले घर भत्काउँदा झडप (हेर्नुहोस् भिडियो )

Sindhu Khabar माघ ३, २०७६ गते १५:०५ मा प्रकाशित

बाह्रविसे, ३ माघ ।
बाह्रविसे बजारमा सडक अतिक्रमण गरि बनाइएका घर टहरा नगरपालिकाले भत्काउँदा झडप भएको छ । नगरपालिकाले डोजरको प्रयोग गरेर अतिक्रमण गरेर बनाएका बजारका घर टहरा विहान ८ बजेबाट भत्काउन सुरु गरेको थियो । स्थानीयले अवरोध गर्न खोजेपछि झडपको अवस्था आएको हो ।
टहरा भत्काउने क्रममा बाह्रविसेको खुर्सानीबारीमा झडप भएको प्रत्यक्षदर्शीले जानकारी दिए । स्थानीयकाअनुसार सामान्य विवाद हुँदा हात हालाहालकोसमेत अवस्था सिर्जना भएको थियो ।
यसअघि भत्काउनु भन्ने पटक पटक सार्वजनिक सूचना जारी गर्दासमेत स्थानीले घर टहरा नहटाएका डोजर प्रयोग गरिएको नगरपालिकाले जनाएको छ । अहिले नगरपालिकाका प्रमुखसहित जनप्रतिनिधि, कर्मचारी, प्रहरीको उपस्थितिमा घर टहरा भत्काइएको हो ।
बजार कुरुप देखिने र सडक साँघुरो हुँदा दुर्घटना हुन सक्ने सम्भावित भएकाले अतिक्रमण गरेर बनाइएका घर टहरा हटाइएको नगरपालिकाका प्रमुख निमफुञ्जो शेर्पाले जानकारी दिए ।
सडक फराकिलो बनाउँदा जाम नहुने र दुर्घटना न्यूनीकरणमा सहयोग हुने जिल्ला ट्राफिक प्रहरी कार्यालयका प्रमुख प्रहरी नायव निरीक्षक राजेशकुमार दाहालले बताए । बजार क्षेत्र साँघुरो हुँदा जामको समस्या भएको उनको भनाई छ ।