वाग्मती प्रदेशबाट पाँचपोखरी र बाह्रबिसेलाई ३० लाख सहयोग

चौतारा । वाग्मती प्रदेश विपद व्यवस्थापन निर्देशक समितिको बैठकले विपदको व्यवस्थापनका लागि सिन्धुपाल्चोकका दुई स्थानीय तहलाई ३० लाख रकम विनियोजन गरेको छ ।

जिल्लाका पाँचपोखरी थाङपालधाप गाउँपालिकालाई १५ लाख र बाह्रबिसे नगरपालिकालाई १५ लाख सहयोग गरेको प्रदेश सभा सदस्य निमा लामाले जानकारी दिए । यसअघि पनि बाह्रबिसे नगरपालिकालाई ३० लाख रकम प्रदेशले सहयोग गरेको थियो ।

त्यस्तै यसअघि जुगल गाउँपालिकालाई १० लाख र भोटेकोसी गाउँपालिकालाई १५ लाख प्रदेश सरकारले दिएको थियो । सिन्धुपाल्चोकका यी स्थानीय तहमा बाढी र पहिरोका कारण जन र धनको क्षति भएको छ ।

भोटेकोसीको लार्चा, बुल्कोट, फुल्पिङकट्टी, बाह्रबिसेको जम्बु, खागदल, जुगलको लिदी र पाँचपोखरीमा पहिरोले जनधनको क्षति पुर्याएको थियो । सिन्धुपाल्चोकमा बाढीपहिरोबाट २३ जना अझै बेपत्ता छन् भने १७ जनाको मृत्यु भएको छ ।