एसइइका सबै परीक्षा केन्द्रमा कोरोनाबारे हेल्प डेस्क

चौतारा, ५ चैत ।

भोलि (विहीबार)बाट सुरु हुने माध्यमिक शिक्षा परीक्षा (एसइइ)का सबै परीक्षा केन्द्रमा कोरोना संक्रमण हुन नदिन हेल्प डेस्क राखिने भएको छ । सिन्धुपाल्चोकका २३ वटै परीक्षा केन्द्रमा हेल्प डेस्कका साथै आइसुलेसन कक्षको व्यवस्था गरिएको हो ।
समान्य ज्वरो, रुघाखोकी लागेका विद्यार्थी परीक्षा दिन आएको खण्डमा छुट्टै व्यवस्था गराउनका लागि आइसुलेसन कक्ष सञ्चालनमा ल्याइने जिल्ला शिक्षा विकास तथा समन्वय इकाइ प्रमुख कृष्ण सुवेदीले जानकारी दिए । अहिले परीक्षा केन्द्र तोकिएको विद्यालय भौतिक रुपमा सक्षम भएकाले आइसुलेसन कक्षका लागि समस्या नपर्ने उनको भनाई छ ।
चार हजार एक सय चार जनाले सहभागिता जनाउने परीक्षाको सबै तयारी सकिएको हो । परीक्षार्थी मध्ये १ हजार ८ सय ३४ छात्र र २ हजार २ सय ६७ छात्र छन् । सम्बन्धीत परीक्षा केन्द्रका प्रधानाध्यापकलाई नै केन्द्राध्यक्षको जिम्मेवारी दिएको शिक्षा विकास तथा समन्वय इकाईले जनाएको छ । यो वर्ष सामुदायिक र संस्थागत गरी १ सय ४९ विद्यालयका विद्यार्थीहरु एसईईमा सहभागी हुँदैछन् ।
प्राविधिकतर्फ१ सय ३२ परीक्षार्थीहरु सहभागी हुदैछन् । प्राविधिकतर्फका लागि चौतारा स्थित कृष्णरत्न गंगा माविमा परीक्षा केन्द्र निर्धारण गरिएको छ । त्यस्तै ग्रेड वृद्धि परीक्षामा पनि १६ जना परीक्षार्थीहरु सहभागी हुँदैछन् ।

क्याटेगोरी : समाज

---

---

---