रेडियो सिन्धुको १२ औं बार्षिकोत्सवमा क्यान्सरपीडित रितुलाई सहयोग

Sindhu Khabar चैत्र १, २०७६ गते १४:२८ मा प्रकाशित

चौतारा, १ चैत ।
जिल्लाको पहिलो सामुदायिक रेडियो, रेडियो सिन्धु १०५ मेगाहर्जले ११ वर्ष पुरा गरी १२ बर्षमा प्रवेश गरेको अवसरमा एक क्यान्सरपीडित पुवतीलाई उपचारका लागि आर्थिक सहयोग गरेको छ । बार्षिकोत्सवको अवसरमा कुनै सार्वजनिक कार्यक्रम नगरि रेडियोबाट प्रत्यक्ष प्रशारण गर्दै क्यान्सरपीडित चौतारा साँगाचोकगढी नगरपालिका ८ की रितु तामाङका लागि आर्थिक सहयोग प्रदान गरिएको हो ।
रेडियो सिन्धुका सञ्चालक समितिका अध्यक्ष एवं रेडियोका स्टेशन म्यानेजरसँगै समितिका कोषाध्यक्ष दिलमाया खड्काले रितुकी बाबु मुन्तेलाई दश हजार एक सय दश रुपैयाँको चेक हस्तान्तरण गरेका हुन् । आर्थिक अवस्था कमजोर भएकी रितु अहिले पाटन अस्पतालमा उपचाररार्थ छिन् ।
उपचार गर्दा थुप्रै रकम खर्च भईसकेको भन्दै पीडित तामाङका बुबा मन्ते तामाङले छोरीलाई बचाउन सहयोगको अपिल गरेका छन् । पीडित तामाङको अहिले ललितपूरको पाटन अस्पतालमा उपचार भईरहेको छ । उनलाई बचाउन चौतारा बहुमुखी क्याम्पसका विद्यार्थीहरु, श्री कृष्ण रत्न गंगा माध्यामिक विद्यालयमा २०६४ सालमा एसएलसी दिएका विद्याथीैको समूह, कल्लेरी युवा परिवारले रकम संकलन सुरु गरेको बताएका छन् ।
बार्षिकोत्सवको अवसरमा समयानुकुल परिवर्तनका लागि पहल गर्दै अघि बढ्ने रेडियोले प्रतिवद्धता सहित विज्ञप्ती जारी गर्दै सा्रेता, विज्ञापन दाता, सुभेच्छुक, शुभचिन्तक एवं सुन्नुहुने सा्रेतालाई धन्यवाद ब्यक्त गरेको छ । स्टेशन प्रमुख रत्न प्रसाख श्रेष्ठले जारी गरेको विज्ञप्तिमा रेडियो सिन्धु सामूदायिक रेडियो भएकोले स्थानीय समूदाय प्रति जिम्मेवार बन्नु पर्छ र सामाजिक उत्तरदायित्व बहन गर्दै आफ्नो कार्यक्रम समुदायको जीवनस्तर उकास्नकैलागि समर्पित हुने गरी कार्यक्रम उत्पादन र प्रसारण गर्नु रेडियोको दायित्व भित्र पर्न आउने उल्लेख गेका छन् ।
रेडियो सिन्धुले आफूलाई पूर्ण रुपमा सामूदायिक रेडियोको रुपमा विकास गर्ने लक्ष्यका साथ विगत साढे तीन वर्ष देखि समूदायमा आधारित सामूदायिक पत्रकारिताको शुरुवात गरेको छ । यसका लागि प्रत्येक विद्यालयहरुमा विद्यालय स्तरिय सामूदायिक पत्रकार समूह गठन गर्ने प्रकृयाको थालनी भइसकेको छ ।
यसैगरि गाउँ वस्ति स्तरमा नै गई अनुसन्धानात्मक रेडियो कार्यक्रम उत्पादन एवं सामूदायिक छलफल प्रक्रियाबाट कार्यक्रम उत्पादन र प्रसारणको समेत शुरुवात गरेको छ ।
आर्थिक एवं घरायसी समस्याका कारण पठनपाठनमा अवरोध भोगेका विद्यार्थीलाई विद्यालयले छनौट गरी सिफारिस भई आएका श्री कृष्ण रत्न गंगा माविमा अध्ययनरत ३ जना छात्र छात्राहरुलाई गत ३ वर्ष देखि छात्रवृत्ती प्रदान गरि आएकोमा उक्त छात्रबृत्तीलाई यस वर्ष पनि निरन्तरता दिइएको छ ।
आगामी दिनमा नविनतम प्रविधि एवं कार्यक्रमको विकास सहित समूदायको सेवामा समर्पित रहने प्रण पनि रेडियोले गरेको छ ।