गौराति मेलामा सामान्य चहलपहल, स्वास्थ्य मापदण्ड अनिवार्य (फोटोकथा)

Sindhu Khabar सोमबार, २०७७ मंसीर १५ / १६:१५

चौतारा । सिन्धुपाल्चोकको ठूलो गौराति मेलामा यसवर्ष सामान्य पूजा मात्रै गरेर सुरू भएको छ । चहलपहल सामान्य मात्रै छ । कोरोना संक्रमणको त्रासका कारण चौतारा साँगाचोकगढी नगरपालिका ६ मा गौरातीमा मेला नहुने भनिएपछि स्थानीयले सामान्य पूजा मात्रै गरेका हुन् ।

दर्शनका लागि मन्दिर पुगेकाहरुलाई अनिवार्य स्वास्थ्य मापदण्ड अपनाउन लागिएको छ । मन्दिर परिसर प्रवेश गर्न अनिवार्य मास्क र सेनिटाइजरको प्र्रयोग भक्तालुले गर्नुपर्ने व्यवस्था मिलाइएको छ । स्थानीय सामाजिक संस्था गौराति भिमसेन विकास युवा मञ्चले व्यवस्थापन मिलाइरहेको छ ।

जिल्ला प्रशासन कार्यालयले गौरती मन्दिर व्यवस्थापन समितिलाई मेला नगर्न अनुरोध गरेपछि गौरती मेला सामान्य रुपमा स्वास्थ्य मापदण्ड अपनाई सञ्चालन गरिएको मञ्चका अध्यक्ष वाङ्गेल लामाले बताए । मेलाका लागि जिल्लाभित्र र बाहिरका भक्तजनको भीड लाग्ने गर्दथ्र्यो । अहिले भीड नभएको मञ्चका अध्यक्ष लामाले बताए ।

प्रत्येक वर्ष कात्तिक पूर्णिमाको दिनबाट गौरती मेला लाग्ने गर्दछ । पूर्णिमामा सुरु भएर पञ्चमिमा सम्म गौरती मेला लाग्ने गर्दछ । धार्मिक रुपले मात्रै नभएर पर्यटकिय रुपमा पनि यो मेला प्रख्यात छ ।

चौताराको पुरानोबजारस्थित गुठीघरबाट भीमसेनको मूर्तिलाई रथमा लगी पूर्णिमाको रात गौराती मन्दिरमा रहेको मूर्तिसँग मिलन गराएपछि एकादशीको दिन पुनः फर्काइन्छ । गुठीयारको घरघरमा समेत पूजा गर्ने चलन छ । तत्पश्चात सिन्दुरे जात्रासहित द्वादशीको दिन मेला सम्पन्न गरिने परम्परा छ । गौराती भीमेश्वर मेलाकै अवसरमा सरकारी पूजासमेत हुने प्रचलन रहेको छ ।