असहमतिको उपचार खोज्दा अरुको अधिकार ख्याल गरौंः पत्रकार महासंघ

सिन्धु खबर बुधबार, २०७७ भदौ २४ / १६:५९

सिन्धुपाल्चोक । नेपाल पत्रकार महासंघ जिल्ला शाखा सिन्धुपाल्चोकले जिल्लाका विभिन्न नदीहरुबाट हुंदै आएको बालुवा उत्खनन् र निकासीका सन्दर्भमा सञ्चारमाध्यमले उठाएका सवालहरुमा जिल्ला समन्वय समितिले आज सार्वजनिक गरेको धारणाप्रति गम्भिर ध्यानाकर्षण भएको जनाएको छ ।

समन्वय समितिका प्रमुख कृष्णगोपाल तामाङले हस्ताक्षर गरेको विज्ञप्तिमा सञ्चारमाध्यमले पित पत्रकारिता गरेको उल्लेख गरेपछि महासंघले ध्यानाकर्षण भएको जनाएको हो । गएको साताभर पत्रपत्रिका, एफएम रेडियो र अनलाइनबाट बालुवाको उत्खनन् र निकासीमा समन्वय समितिले प्रभावकारी भूमिका निर्वाह गर्न नसकेको भन्दै प्रमुख ताामाङलाई व्यक्तिगत रुपमा पनि जिम्मेवार रहेको आरोप लगाइएको थियो ।

सञ्चारमाध्यमले तामाङकोे अवैध उत्खनन् र निकासीमा संलग्न रहेको दावी गरेका थिए । सञ्चारमाध्यमले राजनीतिक आडमा आफ्ना कार्यकर्तालाई जोगाएको समाचार सार्वजनिक गरेका थिए । त्यसप्रति असहमति जनाउंदै तामाङले प्रकाशित गरेको विज्ञप्तिमा सञ्चारमाध्यमलाई गलत समाचार सम्प्रेषण गरेको भन्दै आक्रोस पोखेका छन् ।

पत्रकार महासंघले सञ्चारमाध्यमले उठाएका विषयमा असहमति राख्न सकिने भएपनि आचारसंहिता र कानुनले तोकेका दायरामा रहन आग्रह गरेको छ । महासंघले विज्ञप्तिमा समाचारको खण्डन गर्ने, प्रेस काउन्सिलमा उजुरी गर्ने र त्यसमा पनि चित्त नबुझेमा अदालती उपचार खोज्न सकिने प्रावधानको स्मरणर गराएको छ । आफ्नो अधिकारको उपयोग गर्दा अरुको अधिकार हनन् नहोस् भन्ने हेक्का निर्वाचित संस्थाले राख्नुपर्ने धारणा महासंघको छ ।