‘अस्पतालकै अनुमतिले दाहसंस्कार गरेका हौं’ पूर्वमन्त्री बस्नेत

चौैैैैतारा । नेपाली कांग्रेसका केन्द्रीय सदस्य तथा पूर्वमन्त्री मोहनबहादुर बस्नेतले दुवै किड्नीको खराबीले निधन भएको जानकारी गराएपछि मात्र आफ्ना पिताको शवको दाहसस्कार गरिएको बताएका छन् ।

केही दिन पहिले शिक्षण अस्पताल महाराजगन्जमा पिसिआर परीक्षण गर्दा नेगेटिभ आएको र अस्पतालले घरमै आराम गर्न पठाएको प्रसंग जोड्दै आज राती पोष्ट गरेको आफ्नो फेसबुक स्ट्याटसमा पूर्वमन्त्री बस्नेतले राजनीतिक कुचेष्टा राखेर गलत सूचना सार्वजनिक भएको बताए ।

गत २२ गते राती ११।४५ मा मनमोहन कार्डियो भास्कुलर शिक्षण अस्पताल महाराजगन्जमा निधन भएकोमा भोलिपल्ट विहान ७ बजे आफूहरुले शव बुझेको जानकारी उनले गराए । स्ट्याटसमा अगाडि भनिएको छ,‘मत्युको ६ घण्टापछि आउने रिपोर्ट सातापछि आउनु हाम्रो कमजोरी होईन ।’ कोरोना संक्रमणनै थियो भने हामीलाई अघिल्लो दिन नै शव बुझ्न किन भनियो ? बस्नेतले अस्पताललाई प्रश्न गरेका छन् ।

उपचारमा संलग्न टिमले पिताको निधन हुनासाथ शव निकाल्न भनेको घटना जोड्दै उनले अहिले गलत प्रचार गर्नुलाई अमानवीयताको संज्ञा दिएका छन् । शवलाई बाह्रबिसे ल्याएर दाहसस्कार गरिएको थियो । स्वास्थ्य मन्त्रालयले आजको नियमित पत्रकार सम्मेलनमार्फत बाह्रबिसेका ८४ वर्षीया पुरुषको कोरोना संक्रमणले मृत्यु भएको घटना सार्वजनिक गरेको छ ।

अस्पताल स्रोतले कोरोना परीक्षणको रिपोर्ट नआउंदै शव लगेको बताएपछि मृतकको परिवारकातर्फबाट बस्नेतले स्ट्याटसमार्फत घटना विवरण सार्वजनिक गरेका हुन् ।

कोरोना पुष्टी भएको घटनाले दाहसंस्कारमा गएका नातागोता, आफन्त र शुभचिन्तक पनि अन्यौलमा परेका छन् । बाह्रबिसे नगरपालिकाले नगरको केही वडा र क्षेत्रलाई सिल गरेको सूचना सार्वजनिक गरेको छ ।