बाह्रबिसेका १ सय ८७ को कोरोना नेगेटिभ, सुनकोसीका आठ जनाको रिपोर्ट आउन बाँकी

चौतारा । बाह्रबिसे नगरपालिका ९ राम्चेकी सुत्केरी महिलाको निधनपछि उनका परिवार तथा नजिकका व्यक्तिहरु १ सय ८७ जनाको पीसीआर रिपोर्ट नेगेटिभ आएको छ । जनस्वास्थ्य अधिकृत दुर्गादत चाँपागाईका अनुसार कन्ट्याक्ट ट्रेसिङ गरी स्वाब संकलन गरिएकाको पीसीआर परीक्षणमा १ सय ८७ जनाको रिपोर्ट नेगेटिभ आएको हो । बाँकी आठ जनाको रिपोर्ट भने आउन बाँकी छ ।

राम्चे, बाह्रबिसे बजार र प्राथमिक स्वास्थ्य केन्द्रका स्वास्थ्यकर्मी तथा केही सुरक्षाकर्मीको पीसीआर रिपोर्ट आएपनि सुनकोशी ४ यमुनाडाँडाका ६ जना र साविकको ठोकर्पाका दुई जनाको रिपोर्ट भने आउन बाँकी रहेको प्रमुख चाँपागाईले जानकारी दिए । राम्चेमा दुई दिन लगाएर चौतारा अस्पतालका स्वास्थ्यकर्मीको नेतृत्वमा स्वाब संकलन गरिएको थियो ।

उनीहरुको जेठ ४ र ५ गते स्वाब संकलन गरी परीक्षणका लागि काठमाडौं पठाइएको थियो । ५३ जनाको पीसीआर रिपोर्ट जेठ ६ गते नै आएको भएतापनि बाँकीको रिपोर्ट आज आएको हो । जिल्लामा हालसम्म २ सय ८० जनाको पीसीआर प्रविधिबाट र ७ सय २ को आरडीटी प्रविधिबाट कोरोना परीक्षण गरिएको छ ।

यसैगरी निधन भएकी महिलाको नाबालक शिशु र परिवारका अन्य सदस्यहरु आज हस्पिटलबाट डिस्चार्ज भएका छन् । धुलिखेल अस्पतालको आइसोलेसनमा रहेका उनीहरुको स्वाब संकलन गरि कोरोना परीक्षण गर्दा रिपोर्ट नेगेटिभ आएपछि उनीहरुलाई आज डिस्चार्ज गरिएको होे ।

डिस्चार्जपछि एकहप्तासम्म सम्बन्धित जिल्लाको क्वारेन्टाइनमा राख्नु भन्ने अस्पतालको सुझाव बमोजिम उनीहरुलाई सुनकोसी गाउँपालिकामा रहेको क्षेत्रीय क्वारेन्टाइन्मा राखिने जनस्वास्थ्य प्रमुख चाँपागाईले जानकारी दिए । एक हप्तापछि स्वाब संकलन गरि पीसीआर परीक्षण गर्दा रिपोर्ट नेगेटिभ आएमा उनीहरुलाई घर पठाइनेछ ।