Techie IT
Wednesday, December 2,2020 / बुधबार, मंसीर १७, २०७७
×
गृहपृष्ठसमाचारसिन्धुपाल्चोकका घाटहरुको विवरण तयार गरिने

सिन्धुपाल्चोकका घाटहरुको विवरण तयार गरिने


चौतारा । कोरोना संक्रमण बढदै गएको एक जनाको निधनसमेत भएको अवस्थालाई ध्यान दिएर जिल्लाभरका घाटहरुको विवरण संकलन गरिने भएको छ ।

आज प्रहरी प्रमुख प्रज्वल महर्जनको संयोजकत्वमा बसेको जिल्ला शव व्यवस्थापन समितिको बैठकले संक्रमणबाट मृत्यु भएकाको सहज रुपमा दाहसस्कार गर्न स्थानीयले प्रयोग गर्दै आएको घाटहरुको विवरण जानकारीमा राख्न यस्तो निर्णय गरेको हो ।

संक्रमितको मृत्यु भएपछि दाहसस्कारको व्यवस्थापन मिलाउन सहज हुने भएकाले स्थानीय तहको सहयोगमा विवरण संकलन गर्न लागेको जानकारी प्रहरीले दिएको छ ।

त्यसैगरी शव व्यवस्थापनका लागि शव वाहनको खोजी गरेर राख्न पनि भनिएको छ । शव व्यवस्थापन गर्दा कोभिड-१९ का कारण अस्पतालमा हुने मृत्यु, सवारी साधन पुग्न सक्ने अवस्थामा घरमै हुने मृत्यु, सवारी साधन नपुग्ने अवस्थामा भएको मृत्युलाई आधार मान्न पनि स्थानीय तहलाई अनुरोध गरिएको छ ।

प्रत्येक स्थानीय तहमा महामारीको अवस्था आउँदा शव व्यवस्थापन गर्दा चालकसहित छुट्टै भाग भएको सवारी साधनको व्यवस्थापन गर्न भनिएको छ । त्यस्तै बैठकले नेपाल रेडक्रस सोसाइटीलाई स्वेच्छिक रुपमा शव व्यवस्थापन गर्ने स्थानीय इच्छुक व्यक्ति वा संस्थाको विवरण संकलन गर्न भनेकोे छ ।

त्यसैगरी शव व्यवस्थापन गर्न तोकिएका सामग्रीहरु तयारी अवस्थामा राख्न पनि बैठकले विपद व्यवस्थापन समिति र स्थानीय विपद व्यस्थापन समितिलाई आग्रह गरेको छ ।


क्याटेगोरी : समाचार, समाज
ट्याग : #breaking


तपाईको प्रतिक्रिया दिनुहोस