त्रिपुरासुन्दरीका सबै विद्यालयमा पाठ्यपुस्तक

चौतारा । त्रिपुरासुन्दरी गाउँपालिका भित्र रहेका सबै विद्यालयहरुमा पाठ्यपुस्तक पुगेको छ । त्रिपुरासुन्दरीले सबै सामुदायिक बिद्यालयमा पाठ्यपुस्तक पूर्याउने  योजना अनुरूप सबै बिद्यालयमा पाठ्यपुस्तक उपलब्ध गराएको हो ।

लक डाउनका कारण देशका सबै शैक्षिक संस्था बन्द रहेको अवस्थामा गाउँपालिकाले आफ्नो विद्यालयहरुलाई आवश्यक पर्ने पाठ्यपुस्तकको व्यवस्था आफ्नो पूर्व योजना अनुसार नै गरेको अध्यक्ष भुपेन्द्र श्रेष्ठले जानकारी दिए।

अब केही दिन भित्र सबै बिद्यार्थीको हातमा पुस्तक पुगी सक्ने गरी सहयोग गर्न विद्यालयसंग पालिकाले अनुरोध गरेको श्रेष्ठले बताए । विद्यालयले निशुल्क घर-घरमा पाठ्रयपुस्तक र्पुयाईदिने छन् । यस अघि त्रिपुरासुन्दरी गाउँपालिका ३ ले पनि आफ्नो वडाभित्रका विद्यार्थीलाई गाउँ गाउँ पुगेर पुस्तक वितरण गरेको थियो ।

यस्तै गाउँपालिकाले कृषि नै आर्थिक उपार्जनको प्रमुख आधारस्तम्भ भएकाले किसानलाई थप प्रोत्साहन गर्न सहकारी मार्फत मलमा सहुलियत कार्यक्रम ल्याउने प्रमुख प्रशासकीय अधिकृत गणेश राम पोखरेलले बताए ।

यसैगरी इच्छुक फर्म, समुह ,सहकारीले जेष्ठ मसान्त भित्र कृषि तथा पशु शाखामा सम्पर्क गर्न गाउँपालिकाले सुचना समेत जारी गरेको छ । उनीहरुलाई आगामी वर्षको कार्यक्रममा यसकै आधारमा अनुदान व्यवस्थापन गर्ने गाउँपालिकाको योजना छ ।

कोरोनाको जोखिमलाई मध्यनजर गर्दै त्रिपुरासुन्दरी गाउँपालिकाले रोकथाम र नियन्त्रणको लागि कार्यक्रमहरु संचालन गरेको छ । अध्यक्ष श्रेष्ठका अनुसार चुल्हो बल्ननै गाह्रो भएका प्रत्येक वडाका विपन्न परिवारलाइ राहत वितरण गरेको थियो ।

क्याटेगोरी : समाचार
ट्याग : #breaking

---

---

---