चौतारा साँगाचोकगढीका ६६ जनाको आरडीटी परीक्षण, सबैको रिपोर्ट नेगेटिभ

चौतारा । चौतारा साँगाचोकगढी नगरपालिकामा पहिलो चरणमा गरिएको आरडीटी (द्रुत परीक्षण टेष्ट) परीक्षणमा सबैको रिपोर्ट नेगेटिभ आएको छ । शुक्रबार सम्पन्न आरडीटी परीक्षण गरिएका नपाका ६६ जना कै रिपोर्ट नेगेटिभ आएको चौतारा साँगाचोकगढीका मेयर अमानसिंह तामाङले जानकारी दिए ।

नपाको १४ वटै वडामा गत चैत १ गतेदेखि हालसम्म बिदेश बाट आएका ६६ जनाको परीक्षण गरिएको हो । त्यसमा ८ जना महिला र ५८ जना पुरुष रहेका थिए । हाल नपाको तथ्याकंमा विदेशबाट आएका ६६ जना नै सम्पर्कमा भएको र त्यति मात्रैको आरडीटी परीक्षण गरेको मेयर तामाङले बताए । थप सम्पर्कमा आए उनीहरुको पनि आरडीटी परीक्षण गरिने उनले जानकारी दिए ।

यसअघि विदेशबाट आएका सबैको परिवारका सदस्यहरुको समेत स्वास्थ्य परीक्षण गरिएको थियो । रिपोर्ट नेगेटिभ आएपनि सबैलाई अनुशासित भई क्वारेन्टाइनमा नै बस्न स्वास्थ्यकर्मीले सुझाव दिएका छन् ।

यसैबीच लिसंखुपाखर गाउँपालिकाका ६ जनाको आरडीटी परीक्षणको रिपोर्ट नेगेटिभ आएको छ । गत चैत एक गतेबाट ६ जना मात्रै विदेशबाट आएका गापा भित्रिएको र उनीहरुको रिपोर्ट नेगेटिभ आएको गापाका अध्यक्ष कमल नेपालले जानकारी दिए ।