विद्यालय व्यवस्थापन समितिमा नेकपाको जित

बाह्रविसे, २८ मंसिर ।
बाह्रविसे नगरपालिका ४ स्थित शारदा माध्यमिक विद्यालयको व्यवस्थापन समितिको चुनावमा नेकपाको प्यानल नै विजयी भएको छ । नेपाली कांग्रेस र नेकपाका कार्यकर्ता बिच प्यानलमा निर्वाचनमा भएको हो ।
कुल ५ सय ७२ मध्ये दुई सय ९५ मत खसेको थियो । अभिभावक महिलातर्फ सरस्वती राजभण्डारीले १२२ मत ल्याएर विजयी बनिन् । प्रत्यासी पार्वती खत्रीले ८८ मत प्राप्त गरिन् । त्यस्तै अभिभावक पुरुषतर्फ विष्णुबहादुर खत्री (८६)लाई हराउदै कृष्णप्रसाद न्यौपाने(१२६) बिजयी बने । खुल्लातर्फ अर्थलाल श्रेष्ठ र गोपाल बस्नेत बिजयी भए । अर्थलालले १ सय ३० र गोपालले १ सय १९ मत ल्याएर बिजयी भएका हुन् । उनीहरुका प्रत्यासी जितबहादुर तामाङले एक सय आठ र राजुकृष्ण श्रेष्ठले एक सय १२ मत ल्याएका थिए ।
‘दल र सबैबाट सर्वसम्मत जुटाउन नसकिएपछि विव्यसकै लागि चुनावी प्रतिस्पर्धा भएको हो, नगर शिक्षा ऐनअनुसार योबाहेक अरु विकल्प हामीसँग रहेन,’ सुनकोसी नदीछेउ स्थित शारदा माविका प्रधानाध्यापक तोयानाथ नेपालले भने । चुनावबाट विव्यसको प्रतिनिधि छानिरहदा सबैतिरबाट आलोचना आएपनि विकल्पविहिन भएपछि निर्वाचन गरिएको उनले सुनाए ।
जिल्लाभरका केही विद्यालयमा राजनीतिक पूर्वाग्रहकै कारणले विद्यालय व्यवस्थापन समितिको प्रतिनिधि छान्न हम्मे पर्ने अवस्था आएको अभिभावकवर्ग बताउँछन् । ‘जे भएपनि यसरी कतैपनि चुनाव नै हुने वातावरणसम्म पुगेको छैन्, यसले दुख अनुभव गराएको छ,’उनले भने ।
राजनैतिक प्रतिशोध बनाएपछि नेकपा र नेपाली कांग्रेसबीच अनावश्यक प्रतिस्पर्धा हुँदै आएकाले विद्यालयमा चुनावी वातावरण निम्तिएको स्थानीयको भनाई छ । ‘कांग्रेसका केन्द्रिय सदस्य मोहनबहादुर बस्नेत र बाह्रबिसे नगर प्रमुख निमफुञ्जो शेर्पाको नचाहि“दो लडाइले यस्तो भयो,यसले एकदमै लाजमर्दो सन्देश गएको छ,’ बाह्रबिसे नगरपालिका वडा ७ घुम्थाङका गोम्बे कामी शेर्पाले भने । विद्यालयजस्तो शिक्षा दिइने मन्दिरमा राजनीतिक दलका स्थानीय नेतालाई उभ्याएर शक्ति प्रर्दशनजस्तो गर्न खोजेको उनले आरोप लगाए ।
विद्यालयमा राजनीतिक प्रतिस्पर्धा चलाएर दलको नेता उम्मेद्वार बनेपछि आधाभन्दा बढी संख्याका अभिभावक मत हाल्न आएका छैनन् । मतदान गर्ने कुल अभिभावक ५सय ७२ रहेको शारदा मावि व्यवस्थापन समितिकी निर्वाचन अधिकृत कल्पना घिमिरे जानकारी दिइन् ।