स्याउले, १७ मंसिर ।
साधारण लेखपढ गरेका ५६ वर्षिय एक बृद्धले हेलिकोप्टर निर्माण सुरु गरेका छन् । सिन्धुपाल्चोकको चौतारा साँगाचोकगढी नगरपालिका १ स्थित बदलाङ गाउँका देवबहादुर थापाले हेलिकोप्टर निर्माणको थालनी गरेका हुन् ।
दुई वर्षअघिदेखि हेलिकोप्टर बनाउन सुरु गरेका थापाले आकार दिइसकेका छन् । न्यून आयस्रोत भएको परिवारमा जन्मिएका उनले स्रोत साधनको अभाव भएकै कारण हेलिकोप्टरलाई पूर्णता दिन सकेका छैनन् । सानै उमेरदेखि यस्तै सिर्जनशील कामहरु गर्ने गरेका थापाले यसअघि यस्तै आकारको सानो हेलिकोप्टर बनाएर उडाइसकेका छन् । पहिला प्रहरी प्रशासनले पक्राउ गर्न सक्ने डरका कारण उनले पहिलाको सानो हेलिकोप्टर आफूले बनाएर उडाएको खुलासा भने गरेनन् । त्यतिबेला खुल्ला रुपमा उडाएको सानो हेलिकोप्टर झण्डै डेढ किलोमिटरको दुरीमा पर्ने कातर्चे भन्ने गाउँको एउटा जंगलमा खसेको उनले बताए ।
आफूले बनाएर उडाएको हेलिकोप्टर भेट्टाएकाहरुले के गरे भन्ने बारे उनी अझै अनविज्ञ छन् । त्यतिबेला बनाएको हेलिकोप्टर उडेपछि गर्न सक्ने रहेछ भन्ने लागेपछि उनले अहिले ठूलो आकारको हेलिकोप्टर बनाएका हुन् । आकाशमा उडिरहने हेलिकोप्टर देखेपछि यो पनि मान्छेले नै बनाएको हो म पनि सक्छु होला भन्ने उनलाई बच्चैदेखि लागिरहने गरेको थियो । सामान्य रुपमा घडि, रेडियो बनाउने गरेका उनले हेलिकोप्टर बनाउन अरु कसैको प्राविधिक सहयोग लिएका छैनन् । १२ वर्ष नेपाली सेनामा जागिर गरेका उनले त्यसबेला टेलिफोन, राइफललगायत उपकरण बनाउने गरेका थिए ।
कुनै संघसस्था तथा सरकारी निकायबाट आर्थिक सहयोगको अपेक्षा गरेका थापाले केही सहयोग पाए छोटो समयमै यो हेलिकोप्टर उडाएर देखाइदिने दावी गरेका छन् । झण्डै तीन लाख रुपैयाँ खर्चिसकेका थापाले केही रकमको अभाव रहेको बताए ।
अहिले हेलिकोप्टरको पछाडी र माथि रहेको पंखासमेत घुम्ने गर्दछ । फलामको रड वाइल्डिङ गरेर हेलिकोप्टरको आकार दिएका उनले तीन जना सम्म मान्छे बस्न मिल्ने बनाएका छन् । यो हेलिकोप्टर ब्याट्रीको सहयोगले उडाउन सक्ने उनको भनाई छ ।
थापाले एक्लो जनशक्तिमा हेलिकोप्टर बनाएपछि गाउँवासीसमेत अचम्भित छन् । कतैबाट आर्थिक सहयोग पाएमा उनले हेलिकोप्टर उडाउन सक्ने स्थानीयको विश्वास छ ।
थापाले हेलिकोप्टर बनाएको हल्ल गाउँमा चलेपछि हेर्न जानेहरु बढेका छन् । उनले साविक जिल्ला विकास समिति, जिल्ला प्रशासन कार्यालयमा सहयोगको अपिल पनि गरेका थिए । हालको वडा कार्यालयबाट अध्यक्ष, सचिव लगायतले पनि हेलिकोप्टर अवलोकन गरेका छन् । उनीहरुले सहयोग गर्ने प्रतिबद्धता जनाएपनि हालसम्म कतैबाट सहयोग भएको छैन ।
क्याटेगोरी : समाचार, समाज, सिन्धु खबर टिभी
ट्याग : #breaking
तपाईको प्रतिक्रिया दिनुहोस