नेकपाले जितेको वडामा कांग्रेस नेता प्रमुख अतिथि, वडाध्यक्षले भने, ‘म नेकपा परित्याग गर्न तयार छु ।’

तातोपानी, २ मंसिर ।
भोटेकोसी गाउँपालिका वडा नं. २ मा सोमबार राजनीतिक परम्पराको ठ्याक्कै विपरीत ढंगले एउटा कार्यक्रम सम्पन्न भयो । जहाँ जनप्रतिनिधि नेकपाका थिए । अनि, प्रमुख अतिथि र अतिथि कांग्रेसका नेताहरु । भोटेकोशी गाउँपालिका २ मा तत्कालीन माओवादी केन्द्रबाट विजयी बनेका दिपेन्द्रकुमार श्रेष्ठले वडा कार्यालय भवनको शिलान्यास गर्न नेपाली कांग्रेसका केन्द्रीय सदस्य एवं पूर्व सूचना तथा सञ्चारमन्त्री मोहनबहादुर बस्नेतलाई प्रमुख अतिथि बनाए ।
वडाअध्यक्ष श्रेष्ठले त्यति मात्रै गरेनन् । कार्यक्रममै भने, ‘म वडाको विकासका लागि नेकपा परित्याग गर्न तयार छु ।’ कार्यक्रममा वडाध्यक्ष श्रेष्ठले वडा कार्यालय बनाउनको लागि केन्द्रिय, प्रदेशदेखि जिल्ला नेता र गाउँपालिकामा गुहार माग्दा पर्याप्त सहयोग नपाएको दाबी गरे । ‘एउटा वडा कार्यालयको भवन निर्माणमा सहयोग गर्न उहाँहरुले आलटाल गर्नुभयो, मैले मन्त्री बस्नेतलाई सहयोग मागे, उहाँकै पहलमा माथिल्लो भोटेकोशी जलविद्युतबाट चाँडै वडा कार्यालय ठडिँदैछ,’ उनले कार्यक्रममाझ भने । ९० लाख बराबरको भवन बनाउन गाउँपालिकाले न्युन रकम छुट्याएर हेला गरेकाले बाध्य भएर यसरी जानुपरेको उनले तर्क गरे । भोटेकोशी गाउँपालिका अध्यक्ष राजकुमार पौडेल, उपाध्यक्ष दाबुटी शेर्पासहित नेकपाका नेता तथा कार्यकर्तालाई शिलान्यास कार्यक्रमको निमन्त्रणा पठाएपनि नआएको उनले सुनाए ।
यस वडामा भइरहेको एक कार्यक्रममा स्थानीय वडावासीको प्रतिनिधिमूलक उपस्थिति थियो । कार्यक्रम स्थलछेवैमा निर्माण हुन लागेको वडा कार्यालय भवन शिलान्यासका लागि वडा कार्यालयले सबै तयारी पूरा गरेको थियो । निर्माण हुन लागेको सो वडाको शिलान्यस गर्न प्रमुख अतिथी को आउदैन् स्थानीय वडावासीको मनमा राम््रै खुल्दुली भइरहेको थियो शिलान्यास गर्न को आउँदैछ ?
सबैको कुतुहलता क्षणभरमै मेटियो । स्थानीय अचम्म मान्दै हेर्न थाले । शिलान्यासका लागि कम्युनिष्टका नेता नभइ नेपाली कांग्रेसका केन्द्रीय सदस्य मोहनबहादुर बस्नेत मञ्चमा प्रवेश गरे । मानिसहरु एकापसमा कानेखुसी गरिरहेका थिए । हेर्दाहेर्दै पूर्वमन्त्रीसमेत रहेका बस्नेतले भवनको शिलान्यास गरे । वडावासीले ताली पिटे । श्रेष्ठमात्रै होइन वडाका पाँचै जनप्रतिनिधि पूर्वमाओवादीबाट अत्यधिक मत पाएर निर्वाचित भएका थिए । वडामा कांग्रेस तेस्रो दलको रुपमा थियो । भोटेकोसीको पाँच वडामा पहिलो नंम्बरमा वडाकार्यालय भवन शिलान्यास गरिएको हो ।
गाउँपालिका प्रमुख राजकुमार पौडेल र उपप्रमुख दाबुटी शेर्पा पनि पूर्वमाओवादीबाटै निर्वाचित हुन् । पौडेल र शेर्पा नेकपाका जिल्ला सदस्यसमेत छन् । उनीहरु दुवैजना कार्यक्रममा आएनन् । त्यसो त नेकपाका नेता, कार्यकर्ता र शुभचिन्तक कोही देखिएनन् । कार्यक्रममा कांग्रेस नेताहरुको भने बाक्लो उपस्थिति थियो । प्रतिनिधिसभा क्षेत्र नं. १ का सभापति बालकृष्ण बस्नेत, तरुण दलका जिल्ला अध्यक्ष दोर्जे लामालगायत नेता कम्युनिष्टबाट जितेका जनप्रतिनिधिसँग मञ्चमा गफिँदै थिए । भवनको शिलान्यास गर्दै बस्नेतले कम्युनिष्ट मत भत्काउन सुरु गरेको दाबी गरे । नेकपाले जिल्लामा पद बाँडफाँड गर्दा चित्त नबुझेर श्रेष्ठ असन्तुष्ट थिए । नेकपा भोटेकोसी गाउँपालिका अध्यक्ष दाबी गरिरहेका श्रेष्ठलाई पार्टीले अन्तिम समयमा कुनै पदको जिम्मेवारी दिएन । तर, उनी कांग्रेस प्रवेश गरेका छैनन् ।