भोटसिपा बस दुर्घटना : मृत्यु हुनेको संख्या १२ पुग्योे (अपडेट)

भोटसिपा, २४ असोज ।
सिन्धुपाल्चोकको इन्द्रावती गाउँपालिका १० भोटसिपास्थित बडहरे चोक भएको बस दुर्घटनामा मृत्यु हुनेको संख्या १२ पुगेको छ । इन्द्रावती गाउँपालिका ९ सिपाटारबाट काठमाण्डौंका लागि छुटेको हेलम्बु यातायातको बा २ ख २७१५ नम्बरको बस सडकबाट २ सय मिटर तल खस्दा चालकसहित १२ को मृत्यु भएको हो ।
दुर्घटनामा पचास बढी घाइते रहेको स्थानीय राजेन्द्र आचार्यले जानकारी दिए । पाँच जनाको उपचारको क्रममा धुलिखेल अस्पतालमा मृत्यु भएको हो । पाँच जनाको घटनास्थलमा र दुईको उपचारका लागि लैजाँदै गर्दा मृत्यु भएको प्रहरीले जनाएको छ ।
घटनास्थलमै मृत्यु हुनेमा काभ्रे बनेपाका चालक केदार महाजु, काभ्रे पाँचखालकी संगीता पुर्काेटी, इन्द्रावती ९ का हिरा श्रेष्ठ, सोही स्थानका बिनोद लम्साल, इन्द्रावती १० का रितेश आचार्य रहेका छन् । त्यस्तै उपचारको क्रममा धुलिखेल अस्पतालमा इन्द्रावती ९ की ४६ वर्षिया जुनादेवी लम्साल इन्द्रावती १० का २० वर्षिय गणेश तामाङको मृत्यु भएको हो ।
घाइतेको हेलिकोप्टरबाट उद्धार गरिएको छ । प्रदेश नं. ३ का सामाजिक विका मन्त्री युवराज दुलाल र इन्द्रावती गाउँपालिकाका अध्यक्ष बंशलाल तामाङले हेलिकोप्टरबाट घाइतेको उद्धार गरि उपचारका लागि धुलिखेल र राजधानी लगेका हुन् । दुलालले सेनाको र वंशलालले व्यक्तिगत रुपमा हेलिकोप्टर चार्टर गरेका हुन् ।
क्षतिको थप विवरण आउन बाँकी रहेको जिल्ला प्रहरी कार्यालय सिन्धुपाल्चोकका डिएसपी माधवप्रसाद काफ्लेले जानकारी दिए ।