सिन्धुपाल्चोकमा कोरोना पोजेटिभको संख्या ४ सय ६५, भोलिबाट कोभिड-१९ को प्रेस ब्रिफिङ नगर्ने
चौतारा । सिन्धुपाल्चोकमा कोरोना पोजेटिभको संख्या ४ सय ६५ पुगेको छ । आज स्वास्थ्य कार्यालयले दिएको जानकारी अनुसार जिल्लाभर पोजेटिभको संख्या ६ सय ६५ पुगेको हो ।
सिन्धुपाल्चोकमा ३ सय ४३ पुरुष र १ सय २२ महिलाका संक्रमण देखिएको छ । १ सय ७७ सक्रिय संक्रमित छन् । संक्रमितमध्ये अहिलेसम्म २ सय ७७ जना कोरोना जितेर घर फर्केका छन् ।
जिल्लाभर १७ जना स्वास्थ्यकर्मी र ३४ जना सुरक्षाकर्मी संक्रमित भएक छन् । कोरोनाबाट जिल्लामा ११ जनाको मृत्यु भैसकेको छ । सरकारले दशैको तीन दिन स्वाब संकलन कार्य बन्द गरेकाले कोरोना पोजेटिभको संख्या पनि कम देखिएको छ ।
भोलिबाट सरकारले प्रत्येक दिन गर्दै आएको कोभिड-१९ को प्रेस ब्रिफिङ पनि नगर्ने जनाएको छ । दिनहुँ गर्दै आएको ब्रिफिङ केही दिन बिराएर गर्ने सरकारले जानकारी दिएको छ ।
दशैंका समयमा केही दिन रोकिएको प्रेस ब्रिफिङ बुधबार भएको थियो । भोलि बिहीबारदेखि भने दैनिक ब्रिफिङ नहुने मन्त्रालयका प्रवक्ता जागेश्वर गौतमले जानकारी दिए ।
उनका अनुसार अब सातामा दुई दिन आइतबार र बुधबार कोभिड–१९ प्रेस ब्रिफिङ हुनेछ । अरु दिनको सूचना मन्त्रालयको वेबसाइट, भाइबर ग्रुप र सामाजिक सञ्जालमा दिइने उनले बताए ।
पछिल्लो समय कोरोना संक्रमितको उपचार संक्रमित आफैले गर्नुपर्ने भएपछि परीक्षण गर्नेको संख्या पनि साँघुरिदैं गएको छ । कोरोना उपचारको खर्च उच्च रहेको र सर्वसाधारणको पहुँचमा नरहेकाले परीक्षणको दर पनि घटेको बताइन्छ ।
क्याटेगोरी : स्वास्थ्य/शिक्षा
ट्याग : #breaking
तपाईको प्रतिक्रिया दिनुहोस