भोटेकोसीले गर्‍यो सुत्केरीको हेलिकप्टरबाट उद्धार

सिन्धु खबर असोज २०, २०७७ गते १९:२१ मा प्रकाशित

बाह्रबिसे । भोटेकोसी गाउँपालिकाले सुत्केरी महिलाको हेरिेलकप्टरबाट उद्धार गरेको छ । भोटेकोसी १ बगाम निवासी ३८ वर्षीया दालामु शेर्पाको सुत्केरी भएर अत्यधिक रक्तश्राव भएपछि गाउँपालिकाले आज आफ्नै खर्चमा उद्धार गरेको हो । सोमबार सुत्केरी भएकी शेर्पाको रक्तश्राव नरोकिएकाले जीवन रक्षार्थ तत्काल उद्धार गर्नुपर्ने देखिएपछि उनको उद्धार गरिएको भोटेकोसी गाउँपालिकाका अध्यक्ष राज कुमार पौडेलले जानकारी दिए ।

शेर्पाले सोमबार बगामको चौरी गोठमा बच्चालाई जन्म दिएकी थिइन् । बच्चा जन्मेपछि पनि रक्तश्राव नरोकिएपछि स्थानीयले स्वास्थ्यकर्मीलाई खबर गरेका थिए । दुई घण्टा हिडेर स्वास्थ्यकर्मी पुगेर सुत्केरीको अवस्था निकै जटिल देखेपछि गाउँपालिकामा खबर गरेका थिए ।

तत्काल सुत्केरीको उद्धार नगरे दुर्घटना हुन सक्ने भनेपछि कैलाश एयरको हेलिकप्टरमार्फत भोटेकोसीले सुत्केरीको उद्धार गरेको हो । सुत्केरीको दिउँसो दुईबजे उद्धार गरी थापाथली अस्पताल पठाइएको अध्यक्ष पौडेलले जानकारी दिए । अहिले बच्चा र आमा दुवैको स्वास्थ्य अवस्था सुधारोन्मुख रहेको अध्यक्ष पौडेलले बताए ।