अत्यधिक रक्तश्राव पछि हेलम्बुकी सुत्केरीको हेलिकप्टरबाट उद्धार
हेलम्बु । हेलम्बु गाउँपालिकाले सुत्केरीको हेलिकप्टरबाट उद्धार गरेको छ । वडा नम्बर १ स्थायी घर भएकी पेमा लामाले शिशुलाई जन्म दिएपछि अत्यधिक रक्तश्राव भएकाले हेलिकप्टरबाट उद्धार गरिएको हो । उनले आज दिउँसो साढे २ बजे हेलम्बु ७ इचोक स्वास्थ्य चौकीमा मृत शिशुलाई जन्म दिएकी थिइन् ।
शिशुको जन्मपछि पनि लामाको निरन्तर रक्तश्राव भएकाले एम्बुलेन्सबाट उपचारका लागि काठमाडौं लाँदा लामो समय लाग्ने र आमाको ज्यान जान सक्ने हुँदा हेलिकप्टरबाट उद्धार गरिएको हेलम्बु गाउँपालिका अध्यक्ष निमा ग्याल्जेन शेर्पाले जानकारी दिए ।
मनाङ एयरको हेलिकप्टरबाट उनको अहिले साँझ ५ बजेतिर उद्धार गरिएको हो । उनलाई शिक्षण अस्पताल महाराजगञ्जमा पठाइएको र उनको स्वास्थ्य अवस्था सुधारोन्मुख रहेको अध्यक्ष शेर्पाले बताए ।
क्याटेगोरी : स्वास्थ्य/शिक्षा
ट्याग : #breaking
तपाईको प्रतिक्रिया दिनुहोस