बागमती प्रदेशस्तरीय प्रतियोगिताका लागि वैशाखभित्रै कविता पठाइनुपर्ने

चौतारा, १५ चैत ।
दोस्रो बृहत सिन्धु साहित्य सम्मेलन अन्तर्गत हुन लागेको बागमती प्रदेश स्तरीय कविता प्रतियोगिताका लागि रचना पठाउने अन्तिम मिति वैशाख २०७७ तोकिएको छ । सम्मेलन मूल आयोजक समितिको निर्णयअनुसार वैशाख ३१ गते भित्र आएका कवितालाई मात्रै प्रतियोगितामा समावेश गराइनेछ ।
सम्मेलन यसअघि वैशाख २५ र २६ गते गरिने तय गरिएको थियो । महामारीको रुपमा विश्वभर फैलिरहेको कोरोना भाइरस (कोभिड १९) नियन्त्रणका लागि सरकारले लकडाउन गरेपछि कार्यक्रम स्थगित गरिएको आयोजक संस्था दुःखी प्रकाशनले जनाएको छ । लकडाउन खुलेपछि अर्काे सूचना जारी गर्दे कार्यक्रम मिति तय गरिने भए पनि कविता पठाउने अन्तिम मिति भने यही बैशाख मसान्त तोकिएको दुःखी प्रकाशनका अध्यक्ष सुरेश कसजूले जानकारी दिए ।
बागमती प्रदेशभित्रका कविहरुले सहभागिता जनाउन पाउने उक्त प्रतियोगिताका लागि वैशाख ३१ गते ४ बजेभित्र कविहरुले आफ्नो बायोडाटासहित कविता सम्प्रेषण गर्नुपर्नेछ । कविता पठाउँदा कविले प्रिती फन्टमा टाइप गरि इमेलामार्फत पठाउनुपर्ने र कविता पठाउँदा नाम, ठेगाना, फोन नम्बर स्पष्ट रुपमा खुलाउनुपर्ने आयोजकले जनाएको छ । हुलाक या अन्य माध्यमबाट पठाइएको कविता मान्य नहुने हुँदा इमेल नै गर्नुपर्ने नियम बनाइएको हो ।
कवितामा प्रथम हुनेले नगद ३०,००० (तीस हजार), द्धितीय हुनेले नगद २०,००० (बीस हजार) र तृतीय हुनेले नगद १०,००० (दश हजार) का साथै प्रमाणपत्र प्रदान गरिनेछ ।
आयोजकका अनुसार कविता दुई चरणमा मूल्यांकन हुनेछ । पहिलो चरणबाट मूल्यांकनबाट छनोट भएका १३ कविलाई वाचनका लागि बोलाइने अध्यक्ष कसजूले जानकारी दिए । कविता  poemcompetition.sslc@gmail.com मा पठाउनुपर्नेछ ।