९० प्रतिशत पुग्यो निजी आवास निर्माण (सिन्धुका कहाँ कति घर बने ?)

Sindhu Khabar पुस १६, २०७७ गते १५:४८ मा प्रकाशित

चौतारा ।
विनासकारी भूकम्पबाट सर्वाधिक क्षति पुगेको सिन्धुपाल्चोकमा निजी आवास पुनर्निर्माण अन्तिम चरणमा पुगेको छ । झण्डै ९० प्रतिशत घर ठडिएसँगै पुनर्निर्माणले लक्ष्यको अन्तिम बिन्दु चुम्न लागेको हो ।
पुनर्निर्माण प्राधिकरण, जिल्ला आयोजना कार्यान्वयन इकाइ, अनुदान व्यवस्थापन तथा स्थानीय पूर्वाधार (जिमाली) को तथ्यांकअनुसार जिल्लामा ९० हजार नौ सय चार लाभग्राही छन् । यीमध्ये ८८ हजार ६ सय ७१ पुनर्निर्माणका लागि पहिलो किस्ता वापतको अनुदान लिएका छन् । त्यस्तै ८५ हजार एक सय १० ले दोस्रो किस्ता र ७९ हजार दुई सय एकले आवास निर्माण सकेर तेस्रो किस्तावापतको अनुदान रकम लगिसकेको जिमालीले जनाएको छ ।
भूकम्पपछिको पुनर्निर्माणलाई तीव्रता दिएसँगै निजी आवासतर्फ शतप्रतिशत नतिजा निकाल्ने क्रममा पुगेको हो । जिमालीका सूचना अधिकारी रविराज धितालले यो आर्थिक वर्षमा निजी आवासतर्फको पुनर्निमाण सक्ने दावी गरे । ‘पछिल्लो समय पुनर्निर्माणले तीव्रता लिएको छ,’ उनी भन्छन्, ‘यही रफ्तारमा निजी आवास निर्माण भए बाँकी यही वर्षमा निर्माण हुने देखिन्छ ।’ ‘केहीको अन्तिम किस्ताका लागि प्रक्रियामा छ,’ धितालले भने, ‘अधिकांश प्रक्रियामा छिर्न आउनै बाँकी छ ।’
भूमिहीन, विस्थापित र जग्गा किचलो भएका पीडितले आवास पुनर्निर्माण थाल्न सकेका छैनन् । जिल्लामा एक सय ९७ परिवार भूमिहीन लाभग्राही रहेकोमा ३६ को मात्र कायम भएको छ । त्यसमध्ये एक परिवारले मात्र जग्गा प्राप्ति गरेका छन् । त्यस्तै नौ सय १३ परिवार बिस्थापितमध्ये तीन सय तीनले मात्र जग्गा प्राप्ति गरेर आवास पुनर्निर्माण गरिरहेका छन् । ६ सय १० बिस्थापित जग्गा प्राप्तिको प्रक्रियामा छन् । उनीहरुले आवास निर्माण थाल्न सकेका छैनन् ।
बिनासकारी भूकम्पको ठिक वर्ष दिनपछि २०७३ वैशाख १२ गते तत्कालीन प्रधानमन्त्री केपी शर्मा ओलीले सर्वाधिक क्षतिग्रस्त सिन्धुपाल्चोक सदरमुकाम चौताराबाट निजी आवास पुनर्निर्माण अभियानको थालनी गरेका थिए ।

NP/GP	Total Beneficiary	1st Kista	2nd Kista	3rd Kista
Barhabise Urban Municipality	8245	8077	7797	7199
Bhalephi Rural Municipality	6148	6067	5948	5665
Bhotekoshi Rural Municipality	4377	4221	3920	3186
Chautara Sangachokgadi Urban Municipality	14342	14097	13618	13142
Helambu Rural Municipality	5677	5486	5138	4890
Indrawati Rural Municipality	8594	8467	8200	7831
Jugal Rural Municipality	5740	5687	5587	5475
Lisankhu Pakhar Rural Municipality	5716	5303	4946	4277
Melamchi Urban Municipality	13979	13706	12958	11783
Pachpokhari Thangpal Rural Municipality	7501	7204	6901	6076
Sunkoshi Rural Municipality	5925	5785	5622	5362
Tripurasundari Rural Municipality	4660	4571	4475	4315
Grand Total	90904	88671	85110	79201