तातोपानी । ढेड महिनादेखि बन्द भएको तातोपानी नाकाबाट चीनियाँ सामग्री आउन सुरु गरेको छ । गत असोज १३ गते नेपाली अधिकारी र चिनियाँ अधिकारीबीच तातोपानी नाका सुचारु गर्ने सहमति भएसँगैं आजबाट चिनियाँ सामग्री आउन सुरु गरेको हो । आज ११ कन्टेनर कपडा र कच्चा पदार्थहरु आएको तातोपानी भन्सार कार्यालयका प्रमुख लाल बहादुर खत्रीले जानकारी दिए ।
चिनियाँ पक्षले सामान मितेरी पुलमा अनलोड गरेर फर्किसकेको छ । ती सामान लिन चालक र मजदुर गरी २९ जना ११ वटा कन्टेनर लिएर मितेरी पुलमा सामान लोड गर्न गएका छन् । भरे सम्म ती सामान तातोपानी सुख्खा बन्दरगाहमा आइपुग्ने खत्रीले बताए । भन्सार जाँचपास पछि केही दिनमा ती सामग्री काठमाण्डौं पठाइनेछ ।
कोरोना भाइरसको संक्रमण नहोस भनेर तातोपानी भन्सार कार्यालयले २९ जनाको दुई टोलीलाई सामान लोड अनलोड गर्न तयारी अवस्थामा राखेको छ । ती चालक र मजदुरको ५/५ दिनमा कोरोना परीक्षण गरिनेछ । लामो समयदेखि चीनसँग जोडिएका दुई नाका बन्द भएपछि चीनसँगको कारोबार ठप्प भएको थियो ।
क्याटेगोरी : अर्थ
ट्याग : #breaking
तपाईको प्रतिक्रिया दिनुहोस