बाढीले मध्यभोटेकोसी आयोजनामा अर्बौँको क्षति

बाह्रविसे । बुधबार राति अविरल बर्षासँगै आएको बाढीले निर्माणाधिन एक सय दुई मेगावाटको मध्यभोटेकोशी जलविद्युत आयोजनामा अर्बाै रुपैयाँ बराबरको क्षति पुगेको छ । बाह्रविसे नगरपालिकास्थित जम्बुमा आएको बाढी आयोजनामा पसेपछि त्यहाँका उपकरणहरु बगाएको हो ।
आयोजनाको जम्बुमा रहेका ६ गोदाम पुरिएका छन् । गोदाममा हाइड्रोमेकानिकलका सामग्री रहेको आयोजना प्रमुख सुनिल लामाले जानकारी दिए । अन्य दुई गोदाम पूरै बगाएको छ । गोदाममा पावर हाउसमा रहने टर्वाइन्, जेनेरेटर लगायत मेशिनरी उपकरणका सामाग्री राखिएको थियो । के कति क्षति भयो भन्ने एकिन तयार गर्न सकिएको छैन ।
उनका अनुसार ती सामाग्री केही पुरिएका र केही बाढीसँगै भोटेकोसीमा बगेका छन् । ‘गोदाममा पावर हाउसमा रहने उपकरणका ९० प्रतिशत सामान थिए,’ प्रमुख लामाले भने । चिनियाँ कम्पनी ग्वाङ्सी हाइड्रोले हाइड्रो मेकानिकलको काम गरिरहेको थियो । क्षतिको एकिन बिबरण आउन अझै केही दिन लाग्ने आयोजनाले जनाएको छ ।
आयोजनाका सेक्रेटरी हिमेश शर्मा पहिरोमा बेपत्ता छन् । ‘अर्का एक चिनियाँ प्राविधिक पनि हराइरहेका छन् । उनको अबस्थाबारे केही थाहा भएको छैन,’ आयोजना प्रमुख लामाले भने । पावर हाउसको जेनेरेटर बन्द गर्न गएको बेला आएको बाढीले उनलाई बगाएको अनुमान गरिएको लामाले जनाए ।