भोटेकोशीको बजेट ४४ करोड ७१ लाख, `अध्यक्ष रोजगार` का लागि ५० लाख विनियोजन

भोटेकोशी । भोटेकोशी गाउँपालिकाले ४४ करोड ७१ लाख ६ सय ७० रुपैयाँको बजेट सार्वजनिक गरेको छ । आज सातौं गाउँसभाबाट भोटेकोशीका अध्यक्ष राज कुमार पौडेलले नीति तथा कार्यक्रम र दावुटी शेर्पाले बजेट सार्वजनिक गर्दै चालुतर्फ ५ करोड ८१ लाख ६० हजार, पूँजीगततर्फ १५ करोड ८७ लाख ६८ हजार ८७० बजेट विनियोजन गरिएको छ ।

भोटेकोशीले सडक बोडैबाट ६ लाख र प्रदेश तथा स्थानीय सरकार सहयोगी कार्यक्रमबाट ३ लाख ५२ हजार, भोटेकोशी गाउँपालिकाको आन्तरिक श्रोतबाट १ करोड ४८ लाख ३३ हजार रुपैयाँ र गत आर्थिक वर्षको गाउँपालिकाको बैक मौज्दातबाट ५ करोड ६० लाख १२ हजार ६ सय रुपैयाँबाट यस वर्षको ४४ करोड ७१ लाख बजेट सार्वजनिक गरेको हो ।

त्यसैगरी संघीय सरकारबाट सशता अनुदान ११ करोड ७८ लाख, बागमती प्रदेश सरकार शसर्त अनुदान १ करोड ५९ लाख ५९ हजार पनि गाउँपालिकालाई प्राप्त हुन बजेट वक्तव्यमा भनिएको छ । गाउँपालिकाले विपद व्यवस्थापनका लागि ४५ लाख छुट्याएको छ । त्यसैगरि पूर्वाधार विकासतर्फ १२ करोड २ लाख ६८ हजार ८७० रुपैयाँ छुट्याएको छ । सामाजिक विकासतर्फ ६ करोड १ लाख १० हजार ८ सय रुपैयाँ खर्च हुने गाउँपालिकाको अनुमान छ ।

गाउँपालिकाले ५ वटै वडाको लागि २ करोड ५ लाख रुपैयाँ बजेट विनियोजन गरेको छ । कृषिलाई उत्पादनमुखी बनाउन स्याउ, ओखर, किवी, टिम्मुरलगायतको उत्पादन गर्न किसानलाई प्रोत्साहन गरिनेछ । रोजगार प्रबर्धनका लागि अध्यक्ष रोजगार कार्यक्रमको सुरुवात गरिएको छ ।