सिन्धुपाल्चोक प्रेस युुनियनले गर्यो जिल्लामा क्रियाशील पत्रकारको `कोरोना बीमा`

चौतारा । नेपाल प्रेस युनियन जिल्ला शाखा सिन्धुपाल्चोकमा आबद्ध क्रियाशील पत्रकारहरुको कोरोना बिमा गरिएको छ ।

शाखा अध्यक्ष दुर्गा आचार्यका अनुसार कोभिडसँग सम्बन्धित समाचार संकलनमा खटिने सञ्चारकर्मीलाई सहयोग पुर्‍याउने उद्देश्यले प्रतिव्यक्ति १ लाख बराबरको बीमा गरिएको हो ।

विश्वव्यापी रुपमा महामारी फैलिएको कोरोना (कोभिड-१९) संक्रमण पत्रकारमा फैलने सम्भावित खतरा भएपछि एक पत्रकार बराबर एक लाख रुपैयाँको बिमा गरिएको हो ।

बिमालेख नेपाल प्रेस युनियन सिन्धुपाल्चोक शाखा रहने गरि आएइमई जनरल इन्स्योरेन्स लिमिटेडमा एक वर्षका लागि बिमा गरिएको हो । बिमा अवधि २८ मे २०२१ सम्म रहनेछ ।

बिमा कम्पनी आइएमइका अनुसार कोराना भाइरस (कोभिड-१९) रोग लागेको अवस्थामा र भुक्तानी पाउने व्यक्तिको कानुनी अधिकार प्रमाणित भएमा करारको अवधिमा रही भुक्तानी दिइनेछ ।

बिमा रकम भुक्तानी हुनका लागि व्यक्तिको पीसीआर रिपोर्ट पोजिटिभ देखिएको हुनुपर्नेछ । बिमा कम्पनीका अनुसार यो बाहेक अन्य कम्पनीबाट बिमा गराइएको पाइएमा भुक्तानी भने दिइने छैन ।

संगठनले ठूलो सहयोग गर्न नसकेपनि शाखा सदस्यहरुलाई काममा हौसला प्रदान गर्न सानो प्रयासको थालनी गरेको उनले बताइन् । काठमाडौंलाई कर्मथलो बनाएर क्रियाशील केही सदस्यहरुले आआफ्नो सञ्चारमाध्यममार्फत बिमा गरेको जानकारी पनि आचार्यले दिइन् ।

शाखाले आर्थिकभार आफैंले व्यहोरेर आजैबाट लागू हुनेगरी ५५ जनाको बीमा गरेको छ । आचार्यले भनिन्, ‘अप्ठेरो अवस्थामा जोखिम बहन गरेर पहिलो पंतीमा रहेर काम गर्ने सदस्यका लागि भविष्यमा अन्य सहयोग जुटाउने प्रयास भइरहेको छ ।’