बस्ती जोगाउन प्लम्बिङवाल र जालीगारो

लामोसाँघु, १० चैत ।
बर्षोंदेखि ठाडो खोलाले हैरानी ब्यहोरेका सुनकोशी गाउँपालिका ७ का लामोसाँघुबासीले अब भने मूक्ति पाउने भएका छन् । प्रत्येक बर्ष उनीहरुको घर खहरे खोलाले तन्ने डर थियो । लामोसाँघु पुलपारिका ३० भन्दा बढी घर जोगिने भएपछि उनीहरुमा खुशीको सीमा नै छैन् ।
स्थानीय शक्ति श्रेष्ठका अनुसार खहरे खोलामा बाढी आँउदा लामोसाँघुबासी दिनरात घर छाडेर भाग्नु परेको गुनासो ब्यक्त गरे । अहिले प्लम्विङवाल र जालीगारो लगाइएको छ, आउने बर्षायाममा ढुक्कले सुत्न पाइने भएका छौं श्रेष्ठले खुशी ब्यक्त गरे । श्रेष्ठ मात्रै होइनन् सो बजारका सबै जना घर जोगिने भएपछि हर्षित छन् । जीवनभर दुख गरेको घरसम्पत्तिको रक्षा हुने भएपछि उनीहरु खुशी भएका हुन् ।
बाग्मती प्रदेशका उद्योग, वन तथा पर्यटन मन्त्री अरुण नेपालले ६ लाख बजेट उपलब्ध गराएपछि बस्ती जोगाउन प्लम्विङवाल र जालीगारो लगाइएको शक्तिले जानकारी दिए । सो अनुरुप १९ मिटर १ प्वाँइट ६० उचाई, १४ मिटर १ प्वाँइट १० उचाई र ५० घनामिटर जालीगारो लगाइएको उनले बताए । यसअघि स्थानीयले बस्ती जोगाउनका लागि बिद्युत प्राधिकरण लामोसाँघुमा पटकपटक आग्रह गरेका थिए । उक्त बस्ती प्राधिकरणको अति प्रभावित क्षेत्रमा पर्ने गरेको छ । बस्ती खहरे खोलाले बगाउन लागेपनि प्राधिकरणले कुनै पनि सहयोग नगरेको श्रेष्ठले गुनासो गरेका छन् ।