हेलम्बु, ६ मंसिर ।
वर्षको नौ महिना भन्दा बढि समय खर्क र लेकमा चौंरी र याक डुलाउने हेलम्बु गाउँपालिका–२ का पेम्बा शेर्पा चौंरी मर्दा हुने जोखिम कम भएपछि थप उत्साहित भएका छन् ।
गाउँपालिका भित्र पर्ने फिरन्ते चौंरी गोठलाई लक्षित गर्दै गाउँपालिकाले खर्क र गोठमा पालिएका सबै चौंरीको निशुल्क बिमा योजना अघि बढाएपछि पेम्बा चौंरी पालनमा थप उत्साहित भएका हुन् । सरकारले नेपाल सरकार र किसानको संयुक्त लगानीमा पशु बिमाको अवधारणा ल्याएपछि गाउँपालिकाले किसानलाई प्रोत्साहन गर्न किसानले गर्नुपर्ने लगानी पालिकाले गरिदिने निर्णय गरेको थियो । गाउँपालिकाको निर्णय अनुसार आफ्नो क्षेत्रमा रहेका १५ वटा चौंरी गोठमा रहेका चार सय भन्दा बढि चौंरीको बिमा गरिएको छ ।
पेम्बा जस्तै हेलम्बु गाउँपालिका–१ का साङ्गे शेर्पा पनि बिमा योजनाले आफ्नो लगानी सुरक्षित हुनेमा आशावादी छन् । एक लाख बढि मूल्य पर्ने चौंरी म¥यो भने सबै जोखिम आफैले बहन गर्नुपर्ने अबस्थाको अन्त्य भएको साङ्गे ले बताए । ‘गोठ सार्दै जाने क्रममा चौंरी बिरामी भए झारपातको भर पर्नुपर्ने हुन्छ’, ‘बिरामी चौंरी बचाउन औषधी र चिकित्सकको कल्पना गर्न नसकिने ठाउँमा बिमाले हाम्रो लगानीलाई सुरक्षित बनाइदिएको छ ।’
चौंरीको मृत्युबाट हुने जोखिमका कारण हेलम्बु क्षेत्रको संस्कृतिकै रुपमा रहेको चौंरी पालन व्यवसाय क्रमसः घट्दै गएकाले यसको संरक्षणका लागि बिमा योजना अघि सारिएको गाउँपालिका अध्यक्ष निमाग्याल्जेन शेर्पाले बताए । शेर्पाका अनुसार आफ्नो पालिका भित्र भएका १५ चौंरी गोठका सबै चौंरीको नेपाल सरकार र गाउँपालिकाको साझेदारीमा गोठ र खर्कमै पुगेर चौंरीको बिमा गरिएको छ ।
किसानको जोखिमलाई घटाउँदै चौंरी र यसबाट हुने दुग्धजन्य उत्पादन बढाउन गाउपालिकाले बिमाको योजना अघि सारिएको प्रमुख प्रशासकीय अधिकृत भिमराज कोइरालाले जानकारी दिए । बिमासँगै गाउँपालिकाले चौंरी गोठका लागि मोबाइल चार्ज र बिजुली बाल्न मिल्ने सोलार प्यानल र यसकालागि आबश्यक उपकरण वितरण समेत गरेको छ ।
क्याटेगोरी : अर्थ
ट्याग : #breaking
तपाईको प्रतिक्रिया दिनुहोस