शनिबार, मंसीर १८, २०७८
गृहपृष्ठअर्थचीन बाट विद्युतीय माइक्रोबस आयात सुरु

चीन बाट विद्युतीय माइक्रोबस आयात सुरु


रसुवा, ११ कात्तिक । नेपालको उत्तरी नाका रसुवागढीबाट विद्युतीय माइक्रोबस आयात बढेको छ । शहरी क्षेत्रलाई केन्द्रित गरी व्यवसायीहरुले आयात गरेको २२ वटा माइक्रोबस बुधबार साँझ नेपाल भित्रिएको हो । माइक्रोबस १२ जना यात्रु बोक्ने क्षमताका छन् ।

चीनबाट दिन प्रतिदिन सवारी साधन आयात भइरहेका र दशैं लगत्तै भित्रिएका माइक्रोबसको भन्सार प्रक्रिया पूरा गरी गन्तव्यतर्फ पठाइएको रसुवा भन्सार कार्यालयका सूचना अधिकारी नरेन्द्रप्रसाद चौधरीले जानकारी दिए । दशैं अगावै १०० विद्युतीय कार आयात भएका थिए भने पछिल्लो समय माइक्रो बस आयात हुने क्रम बढेको भन्सार कार्यालय टिमुरेले जनाएको छ ।

शहरी क्षेत्र केन्द्रित गरी आयात गरिएका माइक्रोबसका पाङ्ग्रा होचा भएका कारण कच्ची सडकमा गुडाइ काठमाडौं लैजान निकै चुनौती रहेको सवारी चालकले प्रतिक्रिया दिएका छन् । रसुवागढीदेखि गल्छीसम्मका अधिकांश सडकमा बढी खाल्डाखुल्डी भएकाले साना र होचा सवारी साधन सहजरूपले लैजान बढी असहज हुने गरेको बताइन्छ ।

दशैं अगाडि आयात भएका सानाखाले केही सवारी साधन भने मालधनी एवं उसका प्रतिनिधि नपुग्दा भन्सार हातामा थन्किएका छन् । विद्युतीय सवारी साधनको आयातले प्रदूषणको न्यूनीकरण एवं शहरी क्षेत्रमा वातावरणको स्वच्छता बढ्ने र पेट्रोलियम पदार्थबाट चल्ने यात्रुबाहक साधन क्रमिकरूपले हट्दै जाने बताइएको छ ।

सवारी साधनमा रहने ब्याट्री एक पटक चार्ज गरेपछि चार घण्टासम्म पुग्ने भएकाले बिना आवाज शहरी क्षेत्रको यात्रा अत्यन्तै सहज हुने जनाइएको छ । आर्थिक वर्ष २०७७(७८ को साउनदेखि हालसम्म ९०० भन्दा बढी सानाठूला सवारी साधन आयात भएको भन्सार कार्यालयले जनाएको छ । आयात भएका सवारी साधनबाट नियमानुसार भन्सार शुल्क बापत ६५ करोडभन्दा बढी राजस्व समेत दाखिला भइसकेको भन्सार अधिकारीले बताएका छन् ।


क्याटेगोरी : अर्थ


तपाईको प्रतिक्रिया दिनुहोस

धेरै रुचाईएको
error: Content is protected !!